هناك بعض الفتيات اللائى يتمكن من نيل إعجاب العديد من الشباب، فهل هناك خطوات يمكننى من خلالها لفت نظر من أتطلع إلى استكمال حياتى معه، وما الطريقة الصحيحة للتعبير له عن حبى، وكيف يمكننى التأكد من استعداده للارتباط بى؟

فى البداية لازم نعرف أن الجواز ليس هدفاً بل وسيلة لتحقيق السعادة للمرأة والرجل، وفى بعض المفاتيح اللى تقدرى من خلالها الوصول إلى قلب الشاب. المفتاح الأول: الرجل أحادى التفكير بيفكر فى شيء واحد فقط، طول ما هو فى الشغل بيركز فى شغله بس يعنى لو كلمتيه فى الشغل بيرد ناشف وده مش معناه إنه بيكرهك، علشان تتجنبى ده ممكن تكتفى بس برسالة "أنا عارفة إنك فى الشغل يا حبيبى، لو عندك وقت اتصل بيا أطمن عليك، ومستنياك تكلمنى لما يبقى عندك وقت فاضى".

طيب هو دلوقتى سايق يا كابتن بعد الشغل برده مش بيرد، أيوه علشان مرهق وتعبان وواقف فى زحمة الطريق، طيب رجع بيته يا كابتن برده مش بيرد أيوه هو تعبان وعايز ياكل حاجة الأول وينام، طيب صحى من النوم نعمل إيه، نخلى دماغه بقى عندك ابعتى رسالة "لو عندك وقت فاضى ممكن نتقابل ونتكلم ساعتها" حتى لو مشغول هيفضى نفسه وييجى كده أخدتى الأحادية بتاعته، حتى لو صاحبه كلمه هيلغى كل حاجة ويفضل معاكِ.

المفتاح الثانى : الرجل يعشق أن يقدم شيئا جديدالشريكته ويكون هو المعطاء، يعنى أى حاجة يجبها حتى لو كانت عندك قوليله شكراً يا حبيبى ربنا يخليك ليا، ساعتها هيبقى عايز يجبلك حاجات تانية ويشوف الفرحة فى عيونك.

المفتاح الثالث : الرجل يفضل المنافسات المادية، فمثلا لو إنتوا فى السينما تختاروا الفيلم العاطفى ولا المغامرات، بلاش تختارى العاطفى قولى المغامرات أو الأكشن هيقولك ليه تعالى ندخل العاطفى قوليله الحب اللى بينا أحسن من كل دا، ساعتها هيتبسط جداً وتدخلوا الفيلم الأكشن، طيب لو خارجين وجاله مكالمة من مديره وراح، كده هو مش بيحبنى يا كابتن؟ لا هو بيحبك بس بيفضل المنافسات المادية وعايز يشتغل ويجيب الفلوس علشان يتجوزك، بيحب شغله أكتر من نفسه علشان رجولته فيه، البنت الذكية اللى تعرف تستخدم المفتاح رقم 3 واللى ممكن نستخدمه فى رفع العلاقة إلى المستوى الأعلى عن طريق التنافس مع عدو وهمى، الولد لما يلاقى إنك حباه وتردى عليه يفضل سايبك, وعندما يشعر أنك مش سهلة هيتنافس مع نفسه علشان يجيلك .

المفتاح الرابع: الرجل يحب اللى يمدحه، طبعاً كل ما يعمل حاجة حلوة امدحيه، كده هيفضل يعمل نفس السلوك دايماً علشان يسمع كلمات المدح منك.

المفتاح الخامس: الرجل طماع جداً ويريد أن يحصل من العلاقة معك على كل شيء، علشان كده خليكى نموذج شبه أمه، وصديقته يعنى يحكيلك كل حاجة حتى لو كانت بتضايقك ويفضفضلك إنتِ أحسن ما يروح لواحدة تانية يشتكلها، ومستشارته وفى نفس الوقت حسسيه بالثقة فى رأيه، وسكرتيرته يعنى لو طلب منك تعملى حاجة اعمليها.

المفتاح السادس: الرجل يكره النقد المباشر، فبلاش تنتقديه طول الوقت بشكل مباشر حسسيه إنه اتصرف لكن ممكن يعمل حاجة أحسن من كده .