القاهرة مضلمة

كتبت تهانى الصوابى

خير اللهم ما أجعله خير ،هي الدنيا ضلمت وأظلمت وبقت ظلام حالك غطيس فجأة كدة ليه ؟ من شارع لشارع ، مش لاقية ولا بصيص نور ، أعمدة الكهرباء واقفة شامخة مرصوصة رص جنب بعضها البعض والفوانيس متركبة والتوصيلات متوصلة والحمد لله ،كل ده والدنيا أسود كحل

سألنا وبحثنا هنا وهناك قالوا : أصل خطة ترشيد الكهرباء .ابتدت من أسبوع كدا.. ينهار مش طالع له شمس زى الأيام اللي فاتت كدا ، تاني ترشيد كهرباء ، طب ليه عملنا إيه تاني عشان الحكومة بتاعة هشام قنديل تعاقبنا ؟ ما حنا مؤدبين ومهذبين ومرشدين غصب عننا بسبب فاتورة الكهرباء اللي ارتفعت كدا ..سكت وفي الخباثة وقولنا ماشي ورضينا بالهم لكن يظهر الهم كمان مش راضى بينا ..إيه اللي حصل ياجماعة رمضان خلص وشعبان من قبله وشوال من بعده وزيادة الأحمال بسسبب الأنوار والكهارب والتليفزيونات والمراوح والتكييفات خلاص راح وانقضى وبقينا فى عز الشتاء ، ولا سهر حتى ولا يحزنون وبنام بدرى بدرى لزوم المدارس وامتحانات نص السنة ، طب بالذمة ترشيد إيه تاني ؟ نخرج في مظاهرات للمطالبة بإضاءة المنازل والشوارع ونقول عيش حرية لمبة كهربائية ، بس المشكلة إن المظاهرات لازم تكون فى عز النهار قبل الظلام ما يحل علينا، مش خوف لسمح الله عناصر مجهولة تهاجمنا وترمينا بالمولوتوف ، أو طرف تالت يصيبنا بالخرطوش لكن لأن الظلام هايخلي الخفافيش تخرج من جحورها ، خد بقى معاكسات وتحرش ومفيش مانع اغتصاب للفتيات والسيدات وسرقات بالإكراه وخطف شنط وتثبيت للمواطنين وتقلبهم وتروعهم وإيه اللي ها يمنعهم ما الدنيا ظلمة وسواد حالك، وتخلي الموبيقات كلها مباحة والإجرام على عيني عينك يتاجر والضحية المواطن العادي المسالم الغلبان اللي ربنا كتب عليه الظلام مع أن الله سبحانه وتعالى لم يحرم هذا المواطن من نعمة البصر ، لكن ها يشوف إزاي وها يشوف إيه في ظلام الشارع الحالك ، ونقول إيه وتفيد إيه هي جت على الكهرباء فى الشارع ولا النور اللى رجع يتقطع تانى فى البيوت ولا المياه المقطوعة في كل حتة في مصر من شارع لشارع ومن زنقة لزنقة ، ولاّ المجاري اللي طافحة هنا وهناك ولاّ سيارات النقل اللي واقفة طوابير عشان نقص السولار ومسببة في تكدس مروري وازدحام في الشوارع .. هنقول إيه ولاّ إيه غير إن ربنا يجعله عامر يا حكومة

أخيرا وليس آخرا قام الملك عبدالله ملك السعودية بتعيين 20%من أعضاء مجلس الشورى من السيدات بينما مجلس الشورى المصري يقرر حرمان المرأة من الترشح لمجلس النواب بوصفها في زيل القائمة ، طوف وشوف السعودية بتعمل إيه ومصر بتعمل في المرأة إيه ؟! مجلس منتخب بنسبة 6% من عدد الناخبين يحرم المرأة من الترشح لمجلس النواب وهي تمثل 52%من عدد الناخبين ..نقول إيه " زغردي يا للي ما نتيش معانا وقولي لو لم أكن مصرية لتمنيت أن أكون سعودية "