كتبت: اميرة اسماعيل 

عايز تظبط يومك ؟ محتاج شوية هدوء مع كل بداية يوم , محتاج تقابل نفوس صافية ووشوش تبتسم ؟ كلنا عايزين الأمل فى كل يوم يتجدد فى كل موقف حتى لو كان سلبياً أو صعباً ..

ذهبنا إلى الأصدقاء نسألهم عن خططهم البسيطة لتعديل الأحوال ، والشعور بالبهجة مهما واجهوا من صعاب ، فماذا قالوا ؟! >>

تقول بسنت سامى (21سنة)طالبة : محتاجة أجدد فى حياتي عشان أضبط حياتي ، وأكثر حاجة ممكن تبسطنى مكالمة من الشخص اللي بحبه وبتبقي حاجات بسيطة بتخلى حياتك أجمل ودى الشخصية الإيجابية اللي بتدور على الفرحة فى أى تصرف بسيط.

"مش لازم أستنى حاجة عشان تبسطنى .. ممكن فنجان قهوة بسيط مع ابتسامة أمى تخلى بداية اليوم أحلى بداية" هكذا تبدأ كلامها منار محمد (24سنة)أخصائية مكتبية , وتضيف إن الأفضل لأى شخص أن يبنى سعادته على وجود أشياء وأشخاص بعينها حتى لا يفقد سعادته باختفائها.

وترى سمر عبد العظيم (20سنة) طالبة بكلية الأداب , أن التفوق في الدراسة والبحث الدائم عن تطوير الذات هو مفتاح السعادة لأي شخص وممكن تظبط يومها بالخروج مع الأصحاب في مكان جديد.

ابتسامة ومساعدة الغير

"كفاية انى إقابل أصحابى من وقت للتانى وأشاركهم أفراحهم وأحزانهم .. وأحس إننا سند لبعض" هذا ما بدأ به إبراهيم السيد (25سنة) , الفرحة الحقيقية فى كل يوم بنقدم فيه مساعدة لشخص محتاج وأكيد لما ابتدى يومى بابتسامة هاقدر أواجه أى مشكلة.

"أظبط يومى .. يعنى أصحى والحق معاد شغلى , وألاقى الحب اللى بحلم بيه وتكون أمى راضية عنى "وده أحلى يوم بالنسبة لأحمد عبد السلام (26سنة) موظف.

ويرى خالد محمد (26سنة )أن التدبر فى المشكلة وعدم اعطائها لوقت أكثر هو سبب لهدوء النفس فكل مشكلة ولها الحل ولكن المهم هو الثقة بذاتك وأنك قادر على مواجهة تحديات الحياة مهما كانت , ومهما كانت صعوبة الأزمات .. فالتفاؤل مطلوب فى كل الأحوال.

وهذا ما قاله شاعرنا الكبير صلاح جاهين فى مرة ..

"حاسب من الأحزان وحاسب لها , حاسب على رقابيك من حبلها .. راح تنتهى ولابد راح تنتهى , مش انتهت أحزان من قبلها " وعجبى