كتبت-تهانى الصواب

احنا مش "هانزهق" نفسنا طويل أوى أوى فوق ما يتصور الإخوان ، يعنى نفسنا أطول بكتير من لسانهم اللى عمال يشتم فى الميسرات التعبانة بتاعتهم اللى ما يزدش عددها عن 100 نفر ، ونفر كمان من عندي ويقولوا عليها مليونية وعلى رأى أسحابى بتاع الفيس بوك ( بلاش هزار بايخ يا جماعة اللى مخبى المليونية يطلعها ) ما علينا نرجع للشتائم والعبارات المسيئة طول المسيرات لكل واحد معدي ويعرفوا إنه مش معاهم يحاولوا يستفزوه بشتى الطرق والوسائل ، ولكن هيهات زى ما قلت ولا الهوى ، ولا احنا هنا ، مش الشعب اللى هو احنا عمل اللى هو عايزه وعزلنا مرسى وخلعناه ، مرسى مش راجع تانى ، و يرجع إزاى هو اللى بيروح بيرجع تانى ؟ على رأى ست الستات أم كلثوم فى الستينيات " وعايزنا نرجع زى زمان قول للزمان ارجع يا زمان " ، قولوا للزمن ارجع ، لو رجع مرسى هيرجع ، ما علينا نرجع للاستفزازات فى المسيرات اللى أنا شخصيا اتعرضت لها الأسبوع الماضى ، محاولة الستات والبنات لاستفزازى بالألفاظ والإشارات ، وأنا ولا الهوا ولا كأنهم ماشين جنبى فى العربية ، أنا أصلا مش شيفاهم ولا حاسة بوجدهم ، بالنسبة لي كائنات غير موجودة لإنها بصراحة مش من تعاليم الدين ، لكن نعمل إيه ، رجالة الإخوان اتخلو عنهم ونزلوهم الشوارع وقالوا لهم عليكم وعلى الليبراليين والعلمانيين والمدنيين الكفرة وما تنسوش تعدو على كمائن الجيش والشرطة فى الشارع وتقومه باللازم من الشتائم والسباب علي الشباب اللى واقفين زى الأسود يحموا الوطن من الخونة اللى باعوا نفسهم للشيطان وقاعدين طول النهار يقولوا " قال الله وقال الرسول " ومابيعملوش حاجة خالص من اللى قال عليها الرسول صلي الله عليه وسلم والله سبحانه وتعالي برئ منهم .. ما علنا نرجع للعبارات البذئية اللى مكتوبة على معظم شوارع القاهرة خاصة مدينة نصر ومصر الجديدة وكلها شتائم للجيش اللى حمينا من حرامينا واللى سرقونا ونهبونا وعايزين يسلمونا تسليم مفتاح زى ما بيقولوا الإرهابيين الكبار أوى اللى بيدفعوا لهم علشان يخربوا البلد ، ويعملوا منها سوريا تانية ولكن ورب العزة لا يكون ولا يصير ، هما فاكرين المصريين الـ33 مليون اللى نزلوا الشوارع يوم 30 يونيو و3 يوليو و26 يوليو ..انسوا.. ده فى قدهم لسه فى البيوت ما نزلوش وعلى أتم الاستعداد بإشارة صغيرة من الأصبع الصغير لسيادة الفريق السيسي علشان يلبوا النداء وقت اللزوم ، في أصحاب المليونيات اللى عددها ما يزدش عن 100 نفر زى ما قولت قبل كدة وكمان نفر من عندى اللى ماسك الميكرفون ومشغل الأغنية البذئية المسروقة من لحن " تسلم الأيادى " ومركب عليها كلمات يدعى فيها على جيش بلاده ويقول " تتشل الأيادى " بالمناسبة أنا آسفة لإن اللى يعمل كدة مش راجل ، مش أنا اللى قلت الحقيقة ، من كام يوم واحد صاحب عربية مكرباص كان كاتب عبارة عجبتنى بيقول " لو الرجولة بالرتب كان زمانى بقيت لواء " اهو العبارة دى فكرتنى بالإخوان اللى بيغنوا الأغنية دى ويرددونها بدون وعى لإنهم حافظين مش فاهمين ، ومن هنا بقول لهم بمناسبة العبارة دي وبعد اللى انتوا بتعملوه فى المكيروفونات في المسيرات

لو جيت أدى رجالتكم رتبة يدوبك عريف وكمان كتير عليه ، لإن المفروض أصلا ما يخدش رتبة من رتب الجيش وكفاية عليه قياداته كانوا بيتخفوا فى ملابس منقبات في اعتصام رابعة ، وبمناسبة رابعة والعلامة اللى انتو فرحانين بيها أوى دى اللى أردوغان عملها لكم دى علامة سواقين الميكروباص فى مدينة نصر إشارة للزبائن اللى واقفين فى الشارع دليل على إنه هيعدي على رابعة العدوية .. ما علينا لو انتوا فاكرين الـ100 نفر ونفر اللى انتم مماشينهم فى الشوارع دلول و بيحاولوا يعطلوا المرور علشان يزهقونا ، إحنا ما بتزهقش ونفسنا طويل ، ومع الجيش والشرطة للآخر ، آخر الآخر يعنى لغاية لما انتوا تزهقوا وتتعبوا وتفرفروا وفلوسكم تخلص على الإسبراى اللى عمالين تكتبوا به على الحوائط وتخلوها قذرة ، مع إن الإسلام يحثنا على النظافة ، فالنظافة من الإيمان وكل الناس ما تدهن الحائط وتنظفه تكتبوا تانى ؟ ولا كأن الإسلام دين النظافة ، هو المسلم الحق النظيف يوسخ الدنيا بالشكل ده ، لكن هقول إيه " كل ماعون ينضح باللى فيه " على رأى والدتى رحمة الله عليها .. ما علينا عايزة أقول حاجة أنتم صعبانين عليا أقوى لما تقعدوا تقوله عصيان فى المترو وجمعة الحشد وجمعة الزحف ونلاقى 100 نفر ونفر عملين دوشة بالميكروفونات وقال مليونية قال .. سلامات يا مليونية ..تعالوا احنا هنعلمكم يعنى إيه مليونية بالأدب والاحترام والرقى وتسلم الأيادي {

{ مسيرات عددها مايزدش

عن 100نفر ونفر واستفزازات وشتائم ومحاولة تعطيل المترو وبرضه

مش هنزهق