الإفتتاحية...انا الشهيد
كتبت :ايمان حسن الحفناوي
أنا جاي يوم الأربعاء أفرح معاكم واحتفل
عايز أشوفكم كلكم
عايز أبوس أرض البلد دي
وأضم مصر وأضمكم
ف عيد بلدنا هنجتمع ونلم بعض ونستمع
للي يغني ف حب مصر
للي اتنصف من بعد قهر
لحياة كريمة وطيبة
لفرحة كانت يوم بعيدة
والنهارده قريبة
اوعوا أشوف أبدا دموع ف عيون جميلة حنينة
هقعد معاكم بس ساعة وأرجع لجنة ربنا
طبعا هشوف بلدي في عيد النصر
وردة عبيرها فاق كل الحدود
وهشوف شباب وصبايا مصر
لابسين هدوم العيد وأقوى من الأسود
وهشوف ميداني اللي رواه دمي
مِزَيناه أجمل ورود
وهشوف عروسة إتحررت من كف طغيان شلْها
مصر الحبيبة نورت
وماحد في الكون ده هيبقى قدها
خدتوا بتاري أكيد وراح اللي غدر
خدتوا بتار أمي وأختي وأبويا
وكل قلب ف مصر عانى وانكسر
أنا كنت عارف مِالبداية
دم الشهيد يابلادي مش هيروح هدر
باقي يومين وهتلاقوني وسطكم
وحشتني بلدي، ووحشني أبويا
وحشتني أمي واشتقت ليكم كلكم
وفي يوم 25 يناير 2012
جاء الشهيد.. وصل إلى أرض الميدان تسبقه الفرحة
مالكم كده؟ إيه اللي صابكم يا بشر؟
فين الفرح؟ فين كل راية مرفرفة فوق القلوب الطيبة؟
مش مر عام؟
مش اتفقنا نجتمع بعد ما تمر السنة
وقلنا يومها إننا هنشوف بلادنا بتحتفل
بزوال سنين داست علينا كلنا ؟
أنا كنت بحلم ولا إيه؟
ما تفهموني جرى لكم إيه؟
فين حلمنا؟
وإزاي سكتوا على اللي ضيع دمنا؟؟
شكرا يا بلدي الطيبة
شكرا يا كل عيون دموعها قريبة
ساحة النقاش