<!--

<!-- <!-- <!-- [if gte mso 10]> <mce:style><!-- /* Style Definitions */ table.MsoNormalTable {mso-style-name:"Table Normal"; mso-tstyle-rowband-size:0; mso-tstyle-colband-size:0; mso-style-noshow:yes; mso-style-parent:""; mso-padding-alt:0cm 5.4pt 0cm 5.4pt; mso-para-margin:0cm; mso-para-margin-bottom:.0001pt; mso-pagination:widow-orphan; font-size:10.0pt; font-family:"Times New Roman"; mso-ansi-language:#0400; mso-fareast-language:#0400; mso-bidi-language:#0400;} --> <!-- [endif]---->

ألفين سلام وتحية للمهندس العبقري الذي صمم محور مصطفى النحاس حيث العذاب مروراً كل يوم.

أدفع نص عمري، ولو إنه خسارة يضيع علشان حاجة غبية زي دي، وأعرف مين المهندس العبقرى، فلتة زمانه ومكانه، اللى صمم محور مصطفى النحاس.

ويا سادة اللى ما يعرفش محور مصطفى النحاس، ده أهم شارع فى مدينة نصر كلها، ويربطها من طريق صلاح سالم مروراً بشارع الطيران وعباس العقاد ومكرم عبيد وذاكر حسين، ووصولاً إلى المنطقة الثامنة ثم الحى العاشر، شوفتوا بقى الملل اللى عيشتكم فيه، قد إيه الشارع ده مهم جداً، ورغم هذا السيد المهندس العبقرى اللى صمم الشارع اللى يسكن على جانبيه نصف سكان، إن ماكنش ثلاثة أرباع سكان مدينة نصر، قفل كل الفتحات والملفات والدورانات، وخلاها بس متقاطعة مع الشوارع سالفة الذكر، وحط إشارات حمراء وخضراء وصفراء، وحرم السادة المواطنين من الدوران إلا من هذه التقاطعات فقط لا غير.

ناهيك يا حضرة المحترم، ياللى بتقرأ هذه السطور أن السيد المهندس العبقري عمل فتحة كده  لوجه الله ولذر الملح فى العيون عند آخر المحور قريب من آخر المنطقة الثامنة، يعنى سيادتك علشان تخرج من بيتك، وعايز تروح الاتجاه الثانى من مصطفى النحاس لازم تمشى مسافات طويلة، وبعدين »تتلطع«  ولمؤاخذة فى إشارة من الإشارات سالفة الذكر ربع ساعة، أكثر أو أقل، مش مهم، إنت وحظك، وحسب ساعات الذروة، أما عن ساعات الذروة، يا سادة فهي طبعاً كثيرة هذه الأيام، خصوصاً بعد دخول المدارس والجامعات، ولك أن تتخيل  حجم"اللطعة" اللى سيادتك »ملطوعها« فى الإشارة لغاية ما تفتح، لأنها بتفتح مرة كل 4 مرات، دي مش فزورة، آه والله تفتح فى اتجاه واحد، وتقفل الثلاث اتجاهات الأخرى، وحلني بقه عقبال ما يجي عليك الدور، وتفتح، تكون خلصت حدوتة قبل النوم للأولاد، أو يكونوا عملوا واجب المدرسة، وتكون المدام نظفت الخضار، ومافيش مانع البيه اللى بيسوق يكون لعب دورين ثلاثة »كاندى كراش«.

على فكرة أنا مش ببالغ لا سمح الله، بس أي حد ربنا مش راضي عنه، ومكتوب عليه إنه لازم يعدي من محور مصطفى النحاس هايحس بحقيقة الكلام ده، لأنه هايعيش المعاناة اللى كثير زيه عايشنها، وده بسبب إن المهندس العبقرى خطط ورسم وهندس على الورق، وعمل مداخل ومخارج للمحور على الشوارع الجانبية للمحور، وحط خطوط النقل العام فى نصف المحور عن طريق مخصوص سريع جداً، ودي شهادة حق لأنه ممنوع على العربيات والميكروباص وأى وسائل نقل أخرى إنها تمشي فى الطريق ده، لكن المشكلة يا سادة إنه بينزل الركاب فى نص الشارع، وبالطبع دول عايزين يعبروا ويعدوا على اليمين وعلى اليسار علشان يروحوا الشوارع الجانبية، وطبعاً بيعطلوا طريق العربيات اللى هى أصلاً معطلة بما فيه الكفاية.

ناهيكم يا سادة عن أن فجأة وبعد المحور ما اترصف والرصيف اتدهن، وأعمدة الكهرباء أترصت ونورت جه واحد عبقرى تاني غير العبقري الأولاني، وكسر الطريق بعرض الشارع يمين وشمال، وبالمرة طريق سيارات النقل العام، وده فى أكثر من منطقة، إيه السبب ما حدش عارف، بس أكيد نسيوا يعملوا حاجة أو يوصلوا مواسير، ولا أي حاجة وخلاص، والأدهى إنهم سابوها مفتوحة وما هانش عليهم يسفلتوها، واتهبدى يا أجدعها عربية، واتكسر يا أجمد شاسيه، مش مهم فى ستين داهية العربية وصاحبها وكمان، ده غير عدم الضمير والذمة لأن معظم الدهانات بتاعة الأرصفة اتقشرت ولسة معداش عليها شهر يا ولداه، وما حدش يقولى الشمس لا سمح الله أثرت على الدهانات، لإن يبدو كده والله أعلم إن فى غش فى الدهانات وشمة ريحة فساد فى تشطيب المحور.

يالا ما علينا احنا قولنا اللى عندنا، بس مين يسمع ومين يقرأ، لا السيد رئيس حي مدينة نصر هايعبرنا ويعمل حاجة، كان عملها فى أكوام الزبالة اللى مالية الشوارع، ولا السيد المحافظ هايسمع شكوانا وهايحلها، وعلى رأي الناس اللى كل يوم بتمشي فى محور مصطفى النحاس، لما أنتم ما بتعرفوش تعملوا طرق بتصدروا نفسكم ليه، ما كنتم اديتوها للجيش، وكان عمل معانا أحلى شغل، واسألوا الناس اللى بتمشي على محور الفريق الشاذلى ومحور الفريق الخميس ومحور المشير طنطاوى، طرق ما فيش أحسن من كده آخر حلاوة ونظام وانسيابية، بصراحة طرق وكبارى العسكر ما فيش زيها واسألوا كل اللى بيمروا عليها كل يوم، وأنا منهم، مع الاعتذار للعيال السيس بتوع يسقط حكم العسكر.