تنجح بعض الفتيات فى نيل إعجاب العديد من الشباب، فما الطريقة المناسبة التى يمكننى من خلالها الفوز بقلب من أتطلع إلى استكمال حياتى معه، وما الأسلوب المناسب للتعبير عن حبى له؟

للوصول إلى قلب الرجل لابد من التعرف على مفاتيح شخصيته، وعادة معظم الرجال بيشتركوا فى عدة صفات منها: يسعى الرجل إلى استعادة ممتلكاته حتى التى لا يريدها،بمعنى لو شخص مثلاً عنده جزمة قديمة مركونة بقالها كتير ولو مامته ودتها لأى حد يبدأ يزعل ويروح يدور علشان يستعيدها تانى ويرجع يركنها تانى فى البيت لمجرد إنه مش بيحب يرمى حاجته، ساعتها هو بياخدها ببلاش من غير فلوس لكن لو الحد اللى كانت عنده الجزمة دا طلب منه فلوس مقابل إنه يرجعها كده قدامه حاجتين إنه يقول مش عايزها ويسبها ويمشى، أو يدفع وياخدها وساعتها بقى هيلبسها، نفس الوضع لو إنتِ سبتى الشخص اللى بتحبيه هل هيجرى خلفك ولا لاء؟، أكيد هيجرى بس دا مش معناه برده إنه بيحبك، لو كلمك وماردتيش عليه هيتجنن علشان يستعيدك تانى، فلو استعادك بسهولة هيسيبك تانى بعد ما رجعك، ولو استعادك بصعوبةوقتها مش هيسيبك أبداً، فلازم تتعبيه.

المفتاح الثانى: الرجل يخشى من الفشل فى العمل أو الرفض من الأشخاص وعلاقته بالمرأة تشمل الاتنين الفشل والرفض، لو واحد قالك بحبك وإنتِ رديتى وقلتى وأنا كمان بحبك وتجاوبتى بسرعة، كده هو نجح خلاص يبقى هيسيبك شوية لإنك موجودة كده كده، لكن لو إنتِ أخدتى وقتك وحس إنك رفضتيه هيتجنن ويبدأ يلف ويدور علشان ينال قبولك، يعنى اوعى تخليه يحس إنه نجح فى لفت نظرك وكسب قبولك.

المفتاح الثالث: الراجل مفتاحه عنيه، يعنى هو بيشوف بعنيه ويحب كل ما هو جميل، زى علاقات الإنترنت، الراجل بيصر إنه يشوف البنت أو تبعتله صورتها ولو الصورة ما عجبتوش بيمشى خلاص، عكس البنت مفتاحها ودانها بتعجب بالرجل من كلامه وحواراته، فى يوم من الأيام أحد مشاهدي كلمنى وقالى إنه بيحب واحدة عن طريق الإنترنت وبيتكلموا فى التليفون وعايز يتجوزها، سألته إنت شفتها قال لأ بس بحبها، قولتله إنت متخيل إنها حلوة من صوتها؟ قولتله طيب خلاص انزل شوفها الأول وبعد كده اقعدوا مع بعض وقرروا تكتبوا الكتاب، نزل فعلاً وشافها ورجع قال لى لأ أنا لما شفتها لقيتها وحشه جداً أنا خلاص مش عايزها، يبقى الراجل مفتاحه عنيه، علشان كده لازم يشوفك فى أبهى وأجمل صورة، يعنى لو ما عجبتوش الصورة تبقى كده إنتِ وحشة؟، لأ إنتِ حلوة بس بالنسبة له إنتِ وحشة علشان الصورة إللى فى مخيلتهذهنية مكونة فى عقل الراجل وبتختلف من شخص للتانى ومالهاش مقياس معين، علشان كده الراجل مفتاحه عنيه.

آخر مفتاح: لا يكتفى الراجل بأنثى واحدة أبداً، يعنى إيه؟ الراجل يتجوز اتنين تلاتة؟ لأ الجواز حاجة والإعجاب حاجة تانية خالص، يعنى ممكن الراجل يبقى متجوز واحدة جميلة جداً بس يلفت نظره واحدة تانية بأسلوب مختلف عن مراته علشان زى ما قلنا الراجل مفتاحة عنيه، طيب أعمل إيه يا كابتن؟ ولا حاجة خالص يكفى إنك تعرفى أن مفتاحه عنيه بيبص هنا وهنا.