أنا بحلم

وغيرى لسة كمان بيحلم

لما أبقي أم

كتبت :أميرة اسماعيل

"لما أكون أم .. أنا عايزة أكون أحن قلب على أولادى ,هاعلمهم الحب والاحترام .. بحس كل لما أتخيل نفسى أم "ويا ريت بقى لو كانت "بنوتة"" هاكون أسعد واحدة خلقها ربنا ..

وطبعا أنا عارفة إن مسئولية الأمومة كبيرة ومقدسة علشان كدا نفسى أتعلم وأعلم صحباتى "إللى لسة ربنا مرزقهومش بأطفال" .. بس أمنيتى أبقى أم قريب أوووووى"

ولإن الموضوع يشغل عقل وبال الكثيرات قررنا سؤالهن خلال هذا التحقيق عما ستقوم به كل بنت عندما تصبح أم

داليا فرج(26سنة) موظفة ببنك:أولا أنا هاخد كورسات عن التربية وكيفية التعامل مع الأطفال لإنى ماعنديش خبرة سابقة فى التربية وطبعا اختيار الحضانة والمدرسة هتبقى من أولوياتى لأنها بتأثر جدا على سلوك الطفل وأول ما يشد حيله لازم اشتركله فى النادى لممارسة رياضة.

نسرين البردان (21سنة) طالبة: أنا ماعنديش خلفيات عن تربية الأطفال أو حتى أتعامل مع طفلى الاول إزاى ؟ بس بحلم - زى أى بنت - بالبيت والأسرة والأطفال و نفسى أربيهم تربية سليمة وأخليهم يخدوا قرارتهم بنفسهم يعنى توجيهات بسيطة بس يكون ليهم حرية القرار.

منار سامى (24سنة) أخصائى مكتبة رقمية: طبعا هاحس بالمسئولية الكبيرة لأنى بعشق الأطفال وبخاف عليهم أوى وهاحب أكون أنا الحنينة والأب هو إللى إيد من حديد،ولأنى بحب شغلى برضو هاحاول أوفق بين شغلى وبيتى عشان أعرف دايما الجديد فى الشارع وبالتالى يبقى سهل أتعامل مع طفلى وهاعلمه يخاف من ربنا.

"بصى نفسي فى أطفال كتير بنات وولاد إن شاء الله" وده كلام أمل رمزى(25سنة) :بس علشان لازم نربيهم كويس لاأها مسئولية كبيرة أوى وخصوصا على الأم فلازم نحسبها الأول مش نجيب أطفال كتير ونرجع نشتكى من همهم وإننا مش قادرين نلبى طلباتهم !!

لذيذة قوى

"نفسى فى بنتين " ودى أمنية مها أشرف (21سنة) طالبة.. وكمان لما أكون أم هخلى أولادى أصحابى و هخليهم أحرار بس قبل الحرية هعلمهم معنى احترام النفس .. هعلمهم يفكروا فى الناس قبل أى حاجة .. هحببهم فى علم النفس و فى الحياة.. هخلى الصلى عندهم عادة ..وأصلا الموضوع مسئولية لذيذة جدا ومحببة لقلب أى بنت وهعلمهم يعيشوا طفولتهم بسعادة من غير خنقة ولا تعصب ويارب أنجح فى كده.

وتقول سحر عبد الفتاح (20سنة).. أنا عاشقة للأطفال وأقضى ساعات طويلة بل أيام مع أولاد أختى، وأتوقع أن أكون أحن أم فى الدنيا لأنى فعلا بحب الأطفال ونفسى يكون عندى بنت وولد وحاسة كمان إنى هادلعهم أوى ويمكن أكون بحبهم من دلوقتى من قبل ما أشوفهم.

إحساسى بالأمومة فطرى ومصاحبنى من وأنا صغيرة .. وده كلام أمال حلمى (24سنة)مهندسة ومتزوجة حديثا , وتضيف " لما أكون أم مش عارفة سعادتى هتكون إزاى وخصوصا من زوجى إللى بحبه أوى وأى حاجة هتحصل لطفلى هابقى خايفة ومرعوبة لأن الأطفال مش بتستحمل وهاسيب شغلى لفترة لاعتنى به.

مختلف

مفهوم الأمومة يختلف من ثقافة إلى أخرى ومن مجتمع إلى آخر، فالأم الأمريكية تختلف عن الأم الإفريقية أو الآسيوية والأم الأوروبية تختلف عن الأم العربية هذا ما بدأت به الدكتورة دينا مصطفى أستاذ التربية الخاصة بإحدى الجامعات العربية- وتضيف :أن مفهوم الأمومة يمكن أن يختلف من امرأة وأخرى وإن كانتا من نفس الثقافة لأن العوامل والظروف الفردية تختلف من امرأة لأخرى ومن هنا تبدأ اختلافات الرأي حول تعريف مفهوم الأمومة ومتطلباتها، كما أنها قد تختلف من زمن إلى زمن ، فقد نجد سيدات خائفات من الحمل والولادة وتحمل مسئولية تربية طفل بسبب الأحداث التى تدور فى مجتمعاتهن.

أنواع

وتقسم د. دينا مصطفى الأمومة إلى ثلاثة أنواع : الأمومة الكاملة (بيولوجية ونفسية) وهى الأم التى حملت وولدت وأرضعت ورعت الطفل حتى كبر ، والأمومة البيولوجية :

وهى الأم التى حملت وولدت فقط ثم تركت ابنها لأى سبب من الأسباب وهى أمومة قوية وعميقة لدى الأم فقط ولكنها ليست كذلك لدى الابن (أو البنت)،والأمومة النفسية : وهى الأم التى تبنت الطفل بعد فراقه من أمه البيولوجية فرعته وأحاطته بالحب.

مسئولية

وتضيف د. دينا أن المرأة عندما تصبح حاملا بطفل سيأخذ كل وقتها , تفكر بأمور كثيرة ويأتي على رأسها موضوع السعي وراء إيجاد أسلوب لتصبح أما جيدة ، فالكثير من النساء سيحاولن التواجد الدائم في حياة الطفل والعطاء من غير شروط. ولكن المختصين يقولون بإن هذه الأم المثالية ربما تكون فقط في مخيلة المرأة لأن الواقع يختلف حيث إن محاولة أن تصبح المرأة أما مثالية لا تعتمد عليها فقط وإنما على الطفل ذاته وعلى الأب أيضا، في هذه الحالة من الأفضل أن تفكر المرأة بأن تصبح أما جيدة وليست أما مثالية