بعد طلاقى من زوجى حاولت كثيرا الارتباط برجل آخر إلا أن الأمر فى غاية الصعوبة ما أثبت لى صحة ما كنت أسمعه ممن سبق لها نفس التجربة أن المطلقات مظلومات، فكيف يمكننى الارتباط برجل آخر؟

فى البداية أحب أقول لحضرتك إنك فاهمة غلط لأن المطلقة أكثر حظا من الفتاة، والدليل على كده إن كتير من الشباب يقولوا يا كابتن عايزك تقنعلى بابا وماما إن أتجوز واحدة مطلقة، أقوله ليه يابنى عايز تتجوز مطلقة؟ يقولك دلوقتى الحياة أصبحت صعبة وأنا لما آجى أتجوز بنت بتبقى عايزة تعيش الحب والرومانسية والورد والشعر كل الكلام الجميل دا، بس أنا كشاب دلوقتى بصارع الحياة محتاج زوجة تقف جنبى،وتتحمل معايا المسئولية وتكون فهمت الحياة الزوجية عبارة عن إيه ومتطلباتها إيه، فشالت الأفكار الرومانسية غير الواقعية اللى جربتها فى حياتها الأولى، وفتحت ذراعيها للرومانسية فخدت طلقات نار الواقعية فخرجت من تجربتها لابسة صديرى واقى من الرصاص.

ونفس الحال مع البنات، فى فتاة تحب تتزوج من رجل أكبر منها فى السن تقول لها ليه بتعملى كده؟ تقول لعدة أسباب يا كابتن أول حاجة ما عنديش أى استعداد أبدأ حياتى مع شخص أكبر منى بسنتين يكون بعقلية تافهة ما يعرفش إزاى يتعامل مع الأنثى ويحافظ عليها،كمان إزاى أبدأ حياتى مع شخص مستقبله الله أعلم بيه خاصة فى ظل هذه الظروف الاقتصادية، الحاجة الثانية الرجل اللى تزوج وأنجب وجرب الحياة الزوجية بيبقى عايز حاجة مختلفة من الزوجة الثانية لو أنا قدرت أعطي له الحاجة المختلفة دى يبقى أنا هانجح معاه وممكن أبقى زوجة تانية ناجحة، أما السبب الرابع أنا ما بفكرش إن يكون عندى أولاد أو هو نفسه فى أولاد زيادة فاحنا الاتنين ممكن نجيب طفل واحد نربيه وتبقى حياة مستقرة.

طيب السيدة المطلقة وعايزة تتجوز من راجل تانى متزوج، أقول لها خلى بالك العلاقة دى ستفشل فشلاً زريعاً لاختلاف الأهداف بينكما، إنتِ مطلقة عندك أولاد عايزة راجل يقعدك فى البيت ويعمل معاك زى ما جوزك الأول عمل،نايم معاك يصحى الصبح يروح شغله ويتغدى ويتعشى ويبقى مقيم معاكِ إقامة كاملة، ويبقى مخلف عيال وتخاوى ولاده بولادك ويبقى عملتم فيلم عالم عيال فى عيال، الكلام دا كان زمان أيام لما كانت البيضة بقرش والرغيف بصاغ لكن دلوقتى الحياة غليت، فما فيش واحد يتجوز واحدة بعيالها علشان خاطر يربيهم، طيب ممكن تقولى يا كابتن إنت كده قفلتها فى وشنا، لا مقفلتهاش بس لازم تكونى واقعية، طيب تعملى إيه؟

دلوقتى حضرتك لما يكون متقدملك واحد وإنت مطلقة وعندك أطفالك والشخص دا عايز يتجوز فتأكدى أنه مش عايز يتجوز لنفس أهدافك،إنت فى دماغك نموذج الزواج المستقر وهو فى دماغه الارتباط الجرسونيرة.

طيب فرضاً إن فى شخص عايز يتجوزك إزاى تبلغيه المعلومات دى، أول حاجة يجب أن يقرأ إعجابك فى عينيك دون تصريح بذلك لإن الراجل لو حس منك إنك معجبة بيه هيدخل فى إطار العلاقاتغير المشروعة ويثبتك على الوضع اللى أنتِ فيه وعمره ما هينقل العلاقة للمستوى الأعلى، ممكن تقولى له اسمع يا أستاذ إنت شخص ماتترفضش بس فى نفس الوقت مايتوفقش عليك، عندك مميزات لكن فى نفس الوقت إنت راجل متجوز وعندك مسئوليات وعيال مش الفرخة اللى هتبيضلى بيضة دهب، أنا من حقى أختار راجل يعيش معايا حياة أحسن من اللى أنت هتدهالى، ولو إنت عايز تتجوزنى روح قابل بابايا الأول اعرض عليه طلبك ولو بابايا رفضك أنا أكيد رافضاك لكن لو وافق عليك ساعتها أنا ممكن أحدد الإطار العام والقانونى اللى إحنا هنشتغل بيه هقولهولك من دلوقتى ولو أنا كمان وافقت عليك بعد موافقه بابا، أنا ست مش هتجوز فى العلن لازم جوازتى منك تكون سرية علشان ولادى مايرحوش منى وكذلك النفقة فبالتالى إنت مش مطالب أبداً إنك تصرف على عيالى على الإطلاق، فلو احتجت منك فى يوم من الأيام مبلغ هيبقى على سبيل السلف لا أكثر ولا أقل، فلو إنت موافق دى شروطى عاجباك كلم بابا،أكيد هيقولك عاجبنى وإدينى تليفون والدك، لكن اللى يقولك سبينى أكلم مامتك الأول تعرفى أنه بيلعب بيك لأن الراجل اللى بيروح يتكلم مع الستات بيبقى كلامه كلام ستات.

المصدر: عمرو جرانة
  • Currently 0/5 Stars.
  • 1 2 3 4 5
0 تصويتات / 2341 مشاهدة
نشرت فى 18 يناير 2018 بواسطة hawaamagazine

ساحة النقاش

hawaamagazine
مجلة حواء أعرق مجلة للمرأة والأسرة المصرية والعربية أسسها إيميل وشكرى زيدان عام 1955، وترأست تحريرها الكاتبة أمينة السعيد، ومن يوم تأسيسها تواكب المجلة قضايا وهموم المرأة والأسرة المصرية والعربية. »

ابحث

تسجيل الدخول

عدد زيارات الموقع

19,455,149

رئيس مجلس الإدارة:

أحمد عمر


رئيسة التحرير:

سمر الدسوقي



الإشراف على الموقع : نهى عبدالعزيز